मुंबई : नुकत्याच प्रदर्शित झालेल्या 'सविता दामोदर परांजपे' या चित्रपटात महत्त्वाची भूमिका साकारणारा अभिनेता राकेश बापट गेले महिनाभर गणपतीबाप्पाच्या तयारीत मग्न आहे. दरवर्षीप्रमाणे यंदाही तो बाप्पाची मूर्ती स्वहस्ते तयार करत आहे. या वेळी तो नेमकी कुठली मूर्ती साकारतोय, याबद्दल सर्वांना उत्सुकता आहे.
उत्तम अभिनेता असणारा राकेश उत्तम शिल्पकार आणि चित्रकारही आहे. दरवर्षी तो बाप्पाची वेगवेगळ्या रूपातील मूर्ती साकारतो. गेल्या वर्षी त्याने साकारलेल्या मूर्तीची सर्वत्र चर्चा होती. अभिनेता ऋत्विक धनजानीनेही गेल्या वर्षी राकेशच्या मार्गदर्शनाखाली बाप्पाची मूर्ती साकारली होती.
याबद्दल बोलताना राकेश सांगतो, ‘गणेशमूर्ती तयार करण्याची परंपरा माझ्या घरी पूर्वीपासून आहे. मी गेले अनेक वर्ष गणपतीची मूर्ती तयार करतोय. गणपती बनवताना कोणत्या आकाराचा किंवा तो कोणत्या संकल्पनेवर बनवायचा हे मी कधीच आधी ठरवत नाही, मला फक्त बाप्पा साकारायचा असतो. गेल्या वर्षी नदीच्या गाळाचा आणि नैसर्गिक रंगांचा वापर करून बाप्पाची मूर्ती साकारली होती. या वर्षीची मूर्ती बनवण्याचे काम सुरू असून, लवकरच ते पूर्ण होईल आणि सर्वांना माझा बाप्पा आवडेल,अशी मला खात्री वाटते.’
